Pauba roham!

Turpuk di hita sadarion: Joel 2:13
Jala rohamuna ma ribahi hamu, unang asal ulosmuna, sai mulak ma hamu tu Jahowa, Debatamuna i! Ai pardengganbasa jala parasi roha do ibana, lambas do ibana tarrimas jala parasi roha godang, jala tibu marpangulahi rohana mida hamagoan i.
Koyakkanlah hatimu dan jangan pakaianmu, berbaliklah kepada TUHAN, Allahmu, sebab Ia pengasih dan penyayang, panjang sabar dan berlimpah kasih setia, dan Ia menyesal karena hukuman-Nya.

Naposo ni Debata na margoar si Joel, mansoarahon asa dipauba bangso Israel saluhut pangalaho nasida na so hombar tu lomo ni Debata, i ma na mandao nasida sian Debata, gabe manomba ganaganaan. Rimas do Debata jala ingkon uhumonNa do bangso i, alai marpamuati do rohaNa, gabe disuru ma si Joel palumbahon asa dipauba nasida rohana, asa unang hona uhum alai gabe malua. “Penyesalan” hatiha i tarida do i molo diribakkon abit na, jala mamangke tujung, alai didok si Joel, “rohami ma pauba”. Ai ndang marlapatan molo holan partanda sambing sian pahean manang na manggangguhi, alai hamubaon ni roha sian angka hisaphisap ni daging dohot ihotihot ni portibion. Lambas do rohani Debata jala asi do rohaNa di angka na mangarsakhon dosana, jala ndang targabusan Debata.

Hamumuba ni roha, saturdot do i dohot pangalaho siganup ari, denggan do manang ndang, pangoloi do manang ndang, ndada holan di hata sambing. Molo tangkas taingot, nunga marpiga hali hita marpadan laho paubahon roha? Angka dia ma na mangihoti laho paubahon roha, ingkon i do parjolo taluhonon, isarana hadirion niba, pangalangkupon, na so mangoloi ajar, dohot na asing. Hamubaon na marharoroan sian ias ni roha marparbuehon na uli, alai molo holan di hata do muba hape di roha ndang, ba gabe lam bagas ma hadabuan tu dosa, ndang i dihalomohon Debata. Tutu godang do sibolis na mangelaela asa talu hita, ala tarajumi ma i laho pahothon haporseaonta. Lam jonok tu Tuhan, lam godang do angka na masa, angka sitaonon, siadopan do i! Hamonangan na sian Debata manghorhon haluaon na manontong, gabe parjambar di hangoluan salelenglelengna. Amen

Sipahusorhusoron: Rade do Tuhanta paimahon angka na naeng paubahon roha.
Sitangianghonon: Tuhan, mansai jotjot do hadirion dohot hagiot ni daging manggohi rohangkon, asi ma rohaM, marpamuati ma rohaM, Tuhan, Amen.

Sian Buku Sijahaon Siganup Ari di HKBP: “Pajonok hamu ma tu Debata”
HKBP Lubuk Baja, Batam

Leave a Reply

Your email address will not be published. Required fields are marked *