Surat tu Dainang

Surat tu Dainang

Jakarta, 16 July 2008 Tumopothon, na huparsangapi jala na huhaholongi, dainang pangintubu di huta.

Horas ma inang nauli basa, Hipas do hami dison, au borum dohot helam, songonima nang pahompum na tolu i, si Alex, si Bram nang si Tikkos, hipas-hipas do hami dison, suang songoni ma nian ho pe inang nabasa, nauli lagu, sai anggiat ma dibagasan pangaramotion na sian Tuhanta pardenggan basa i, na mangalehon akka hahipason dohot ganjang ni umur di ho inang nauli lagu.

Inang Naburju, Nunga tung masihol hian hami tu ho, inang, ai takkas do diboto ho, nunga lima taon hami dang ro mandulo ho tu huta, jala pahompum pe nunga masihol marnida oppungna, toho do i inang. Alai alani akka kesibukan, nang alani parsiajaran ni akka pahompum on, dang boi dope hami mulak mandulo ho inang. Mardomu muse, helam pe na baru diangkat pe gabe pejabat di kantor pajak di jakarta, jadi tung mansai sibuk situtu do hami nuaeng. Inang Nauli basa, Ia pahompum si Alex, ima pahompu siangkangan i, nunga be masuk kuiah ibana di Pelita Harapan, jala las do roha marnida, ai di haburjuhon ala dihagiothon do namarsiajar i. Molo binereng sian sitta-sittana, ikkon mambuat S-3 manang doktor do ninna di Australia ibana, las roha tutu inong, jala ho pe inong, las ma roham mambege i, ai gabe jolma na hasea do hape annon pinompar mon.

Angkup ni i, mulai saonari nunga be hudepositohon hami tu bank hepeng nami, asa dung tammat ibana lima taon nai sian Jakarta on, adong modal pasikkolahon tu luar negeri. Inong, songoni do nang pahompum sipetonga, ala dang olo talu ibana tu abangna, ikkon disingapura do ibana ninna sikkola SMU, jala songon natua-tua na bartanggungjawab hami, huoloi hami do i. Alai, onma sada nai pangidoanna, nang pe kalas tolu SMP dope ibana, nunga dipangido ibana sada Mobil dalan-dalanna, ujungna di patulus helam do pangidoanna i, nunga dituhor sada mobil ima mobil Terrano sisaonari i, tole ma naroha, asalma burju sikkola.

Asing muse do pahompum siappudan on, dang olo be mamakke sedan BMW na hutohor hami na taon na lewat, didok ibana, diparekkeli donganna sasikkola do ibana ala dipakke sedan na leleng, jadi terpaksa ma hu cicil-cicil sada BMW nabaru sian showroom an, ipe asa songon na denggan huida bohina lao tu sikkola. Inong, ai diingot ho dope tahe, tikki ro ho tu Jakarta on? ima lima taon na salpu? tikki i hea hupatuduhon tanotta na di Cibubur i? ima tano na 2 hektar i?. Nunga dibangun helam be sada jabu disi, ninna molo matua muse asa adong inganan parlape-lapean, jala molo ro inong sian huta asa songon na tenang tinggal dijabu, ala takkas diboto ho inang, molo inganan nami sisaonari, ima huta Pondok Indah on, nunga tung mansai rame hian be. Jala minggu depan, naeng ro do martamue, atasan ni helam tu jabutta, ima Dirjen Pajak sisaonari. Jadi attusi inang ma ai ila do roha molo songon na so suman jabu manomu akka pejabat ni negara on.

Jadi sude akka perabot na dijabu i nunga huganti pe dohot nabaru, jala kolam renang nadipudi ni jabutta i pe nunga hubaen jala hupabolak sampe tu opat meter nama bolakna. Jala hubaen do sopo-sopo di tonga ni taman nadipudi ni jabu i, ai dipangido pahoppum siampudan i, molo ro donganna asa tu si nasida marpungu. Inang naburju, Marsogot, arisan do dijabu, ima akka arisan ni istri ni pejabat. Jala asa unang maila au inang, borum nasasada on tu akka istri ni dongan ni helam, bah nunga hutuhor be berlian horung dohot sibong. Molo di ingot inong i, hea tabereng di Mall Pondok indah, songoni do inong sipata, asa unang maila iba. Jala helam pe, ai sadalan do dohot tu umur, didok ibana, dang soksok be ibana mamakke Mobil si saonari, jadi nadi bulan na salpu i, diganti ibana do mobil na i gabe merci keluaran terbaru. jala ala sude do hami luhut nunga marmobil, ikkon pabolakon nami nama garasi ni jabutta i, asa muat sude. Jala tamba ma pembantu dohot tukang taman saonari dijabutta on.

Inong na lagu,….. songoni ma jo kabar sian hami borum dohot helam, ala tung mansai godang do pengeluaran nami di bulan on, bah marpanganju ma ho inang, DANG TARBAHEN HAMI DOPE MANGIRIM BALANJOM bulan on, ai sian pensiun ni Bapa i ma jo pakke. Hurasa sukkup dope di inang i, so pola sadia be akka kebutuhanmu di huta. Jadi sotung unang pola boha roham inong, ala so boi hami mangirim tu ho bulan on, na lagi menipis do keuangan nami, hape Deposito jala bungana na adong di bank pe dang tarbuat dope bulan on. Sai Tuhanta ma namandongani hita ganup ulaonta, amen

Borumu,

Nai Holit Mangging nyonya Sipanggaron.

NB: Adong hape na lupa inang –Dang di Jakarta hami dua minggu na ro on, alana naeng lao hami marlibur, mardalani tu Bangkok dohot tu Sanghai, China. Tangianghon hami inong, asa hipas-hipas mulak tu Jakarta

1 Timotius 6:10 “Karena akar segala kejahatan ialah CINTA UANG.Sebab oleh memburu uanglah beberapa orang telah menyimpang dari iman dan menyiksa dirinya dengan berbagai-bagai duka.

Publikasi > Tulisan > Cerita & Kisah

HKBP Lubuk Baja, Batam

Leave a Reply

Your email address will not be published. Required fields are marked *